Oté la réunion ! Cliquez ici pour écouter le jukebox !
Bienvenue sur Le Forum de la Culture réunionnaise et mauricienne ! INSCRIVEZ-VOUS et faite une présentation !!
Ajoutez ce site a vos favoris Espace d'échange familial - amical :: piapiatéks gi douyér - ré-ékri par OF - 30-12-98
Espace d'échange familial - amical Index du Forum Espace d'échange familial - amical
Forum ayant pour but de regrouper les familles, échanger des connaissances, des astuces, des évenements...
 
 FAQFAQ   RechercherRechercher   MembresMembres   GroupesGroupes   S’enregistrerS’enregistrer 
 ProfilProfil   Se connecter pour vérifier ses messages privésSe connecter pour vérifier ses messages privés   ConnexionConnexion 

piapiatéks gi douyér - ré-ékri par OF - 30-12-98

 
Poster un nouveau sujet   Répondre au sujet    Espace d'échange familial - amical Index du Forum -> Ile De La réunion & Ile Maurice -> Kabar Créole
Sujet précédent :: Sujet suivant  
Auteur Message
vavie974
Administrateur Lo Sér

Hors ligne

Inscrit le: 12 Jan 2008
Messages: 1 516
Localisation: strasbourg
Pays d'origine: Ile de la Réunion
Féminin Sagittaire (22nov-21déc) 馬 Cheval

MessagePosté le: Mar 19 Fév - 16:56 (2008)    Sujet du message: piapiatéks gi douyér - ré-ékri par OF - 30-12-98 Répondre en citant

téks gi douyér - ré-ékri par OF - 30-12-98
 

Navé inn fwa bou inn bone fwa, in ti martin, té i abit koté Salazi, déyér soléy laba, é té i apél Pyapya.
Ti martin la, lété tou sél. Son momon lavé ponn in paké d’zéf, mé mal kamaléon la pas dann ni é la gob inndé.
 

Son bwa d’zél té fine pousé, li té vol vol la minm koté lo ni son momon. Mé banna té i fatig son tété, son momon plis pir ankor.
 

@
In zour Pyapya la désid dsann in kou dan léba, i fo konét in pé d’soz si wi vé nir in nonm.
- Pourvi ké mi pérd pa, li la kalkilé.
 

Pou sa minm dawar, Pyapya la mazine suiv lo bor ranpar la Rivyér di Ma an dsandan…
 

Promyé lélan li la pran, Pyapya la mank pérd lér, télman kouran dér la piy ali atér…
- Oté !
Li kalkil, si mwin lavé pa donn in bon kou d’rin, lo kap noré bat ék mwin, ma port antansyon astér.
 

@
An dsandan, kan li la riv la otér lo pon de léskalyé, ti martin té anvi arpoz in bon kou, li wa in pyé d’bwa még zis kosté ék lo pon.
- Non vomié pa mi poz la ! Nana touzour in marmay pou fé la mais ék do moun ék zot flés lastik.
Alors li la poz par dsou lo pon, si in bar lo fér.
 

In ti néstan minm, li komans arpoz son ti zél i tranm ankor. Na in loto la travérs si lo pon, sa la fé si télman dézord, ké Pyapya la kalkil lo ronm ék do sél, kapkap té si li, li la giny sézisman, la pat la flésé, la sapé, rézman lavé in ti brans in pé pli lwin, li la giny poz dsi.
 

- Foutor ! Promyé fwa mi antan in dézord konm sa ! Dawar loto i mars ék loraz ! Si mwin té pa vif, mon kont té o fon la rivyér.
 

 

@
La tranblad ankor si li, kan li antan :
- Pya Kouyon, Pya Kouyon.
In zén ti fémél martin la pou mok ali.
Pyapya ék la tranblad é la raz la vol si lo ti fémél pou koriz son mové manyér.
Mé lo ti fémél séd sap dann bwa…
- Lés ali nartrouvé dan in krwazman d’somin malizé.
 

@
Mé sad la fé fane son sézisman, sé kan li la vi in gramoun ké lavé kalbit dan la ranvérs kanal ék in panyé d’komisyon saviré akoté d’li.
 

- Surman lé sou ! Afér i bwar kan i giny pa ! Ma okip touzour lo grinn ri lé fané koté panyé.
 

Martin la komans bék bék in dé grinn ri, mé zot la fine war martin sa lé pir ké lo ra dann magasin, lé in pé voras, li séd sot si lo bor panyé pou war kosa na ankor pou manzé la dan…
 

@
Lo panyé séd kapoté é  wala Pyapya sou lo panyé…
 

Aforstan lér i vyin fré, ék la tit farine pli, lo gramoun la débat in kou é la trouv nout ti Pyapya…
- Na lontan mi rod in ti martin ! Ma koup out filé ! Aprésa ou va kozé…
 

Kan Pyapya la antann i sar koup son filé, traka la mont si li.
- Mon pwa lé o fé, mwin noré di rés labon o ék momon…
 

Lo gramoun la pas la min sou panyé, kap lo ti martin, amar son dé pat zonn é séd port ali konm in fay poul bazar.
 

@
Ariv la kaz lo gramoun, la mét Pyapya dann in panyé si la tab ék dé trwa grinn maï, in mok do lo é pardsi la mét dé plans kés ék in kalou pou péz dosi.
Kan la fini la délas in pé son gatir, é lo gramoun fiér la parti bwar in kou la boutik ké lété pa tro lwin.
 

@
Dék lo gramoun la tourn lo do, lo sat i vyin asiz dovan panyé. Ti martin i wa son zié i klat konm vér boutéy atravér lo trou panyé.
Li lavé zamé vi in si vilin bébét, an plis lo sat la i pi.
Kan lo sat la komans grafine lo panyé ék son grif, la Pyapya té i va pi ditou…
- Lo vié gramoun i vé koup mon filé, lo vilin bébét mésan ki pi i vé manz amwin, mwin la rod bézman pou mon kor !
 

@
Ala lo  gamoun i artourn, sort la boutik, ankor plis an luil ké talérla.
- Mon ti martin, tanto ma koup wot filé, é pisa wa kozé…
Afors répét sa dé trwa fwa lo gramoun la kapot si lo li vant an lér é konm in boug sou la giny soméy…
 

 

Kan Pyapya la antann sa la di :
- La i fo mi sort la dsou vitman, sinon mwin lé moungé !
 

@
Ala lo sat i arvyin…
Pyapya i di ali :
- Gramoun la i vé koup mon filé, aou ou vé manz amwin, mwin lé fatigé, mi profér sé ou i manz amwin, é sar pli prop osi…
 

Lo sat la di :
- Mwin si mi profér konm sa, mé koman nou va fé ?
 

Martin la réponn :
- Vi wa lo plans kés dsi panyé ? Vi mont si lo bout é pisa vi sot, vi sot, é pi vi manz amwin…
 

Lo sat la kalkil in kou é pi la di :
- Si wi sort sou panyé ou va sapé…
 

Martin la réponn :
- Mi pé pa mon dé pat lé anmaré.
É Pyapya i amont son dé pat amaré ék lo gatir.
 

Kan lo sat la vi sa la di :
- Ala mi sot ! In !
 

@
Li sot, lo plans i débouz zis in ti pé minm.
 

Sou la tab lo syin i gard lo sat. Martin i di lo sat :
- Wi sot pa si télman for !
 

Lo sat i di :
- Plans ék kalou lé tro lour pou mwin…
 

Pyapya la di :
Mont si bifé wa giny lélan !
 

@
Lo sat la réponn :
Ma giny lélan ék lo syin wi ! Pars pou mont si bifé i fo mi dsann atér é la lo syin va moung amwin.
 

Martin la di :
Pa bozwin dsann atér, sot si dosié la séz, apré sa sot si bifé.
 

Kan lo sat la soté, lo séz la baskil si lo rin lo syin.
Ala lo syin lé bandé, é li grony :
- Si mi trap inn, mi manz lé dé !
 

@
Anlér bifé, lo sat pou rod in manyér pou sot si lo plans.
 

Martin i di :
Anvoy aou mon dé pat lé byin anmaré !
 

Lo syin sou la tab i grony rant son dan :
-Sot aou, si ou la manké, mi mank pa ou !
 

Kan lo sat la soté, lo plans la artoun din sél kou é la bat ali a tér. Avan kli rodrés lo syin déyér li, é ala i komans batay. Pyapya la di, ala mon tour la rivé, li séd vol par la fénét, si in pyé d’lila dann fon la kour.
 

@
Li bourif in kou son plim, sakouy ali in kou éli wa promié pou sort dann la kaz, lo sat, lo syin déyér é lo gramoun ék in bwa fandu déyér zot dé.
Ti martin la pran in gran lélan é vrouiiik, vrouiiik… la arpran somin Salazi…
 

 

@
Kan la riv la kaz son momon, li fé son gro zéf, li mars léstoma an lér, konmm in vré gran mal martin, é li rakont partou koman li la fé konésans in vyé gramoun, la fé zami ék li, la invit ali son kaz, fé kui bon manzé pou li… Mé lavé zanimo si télman mal élvé, épi gramoun té i inm tro la rak, ké li la profér pa résté…
Tout lo bann ti mal ék ti fémél martin i akout ali rakont koman in zén ti fémél koté lo pon d’léskalyé la ri ék li, sirman i voulé maryé, mé li la profér di non pou koméla !
 

@
Télman lo bann zén martin i ral lo kér si son zistwar, ké Pyapya li minm i komans krwar lé vré pou tout bon, sad li pou rakonté.


Revenir en haut
Skype
Publicité






MessagePosté le: Mar 19 Fév - 16:56 (2008)    Sujet du message: Publicité

PublicitéSupprimer les publicités ?
Revenir en haut
kalou
Administrateur lo Frér

Hors ligne

Inscrit le: 12 Jan 2008
Messages: 817
Localisation: Strasbourg
Masculin Capricorne (22déc-19jan) 猪 Cochon

MessagePosté le: Mar 19 Fév - 17:02 (2008)    Sujet du message: piapiatéks gi douyér - ré-ékri par OF - 30-12-98 Répondre en citant

Ousa ou la trouve zhistoire là !!! Le kreol lé cho pou lire par contre, ma eu du mal mi avoue.... Embarassed




Revenir en haut
vavie974
Administrateur Lo Sér

Hors ligne

Inscrit le: 12 Jan 2008
Messages: 1 516
Localisation: strasbourg
Pays d'origine: Ile de la Réunion
Féminin Sagittaire (22nov-21déc) 馬 Cheval

MessagePosté le: Mar 19 Fév - 17:42 (2008)    Sujet du message: piapiatéks gi douyér - ré-ékri par OF - 30-12-98 Répondre en citant

et enkor on dirai c pas lo vrai lekritir creol hein, trop doss ti zistwar la, le pire a mwen oci mi na du mal lire mais lé trop drole!! ^^

Revenir en haut
Skype
Contenu Sponsorisé






MessagePosté le: Aujourd’hui à 13:16 (2016)    Sujet du message: piapiatéks gi douyér - ré-ékri par OF - 30-12-98

Revenir en haut
Montrer les messages depuis:   
Poster un nouveau sujet   Répondre au sujet    Espace d'échange familial - amical Index du Forum -> Ile De La réunion & Ile Maurice -> Kabar Créole Toutes les heures sont au format GMT + 1 Heure
Page 1 sur 1

 
Sauter vers:  

Portail | Index | Panneau d’administration | Creer un forum | Forum gratuit d’entraide | Annuaire des forums gratuits | Signaler une violation | Conditions générales d'utilisation
Powered by phpBB © 2001, 2005 phpBB Group
Traduction par : phpBB-fr.com
Théme Réalisé par Kalou